Barnasýningar

Barnaverk í Tjarnarbíó leikveturinn 2026-27

Athugið að allar sýningar í Tjarnarbíó hafa stuttan sýningartíma og því mikilvægt að bóka tímanlega!

INNBLÁSTUR

Innblástur er glæný barnasýning sem fjallar um leikgleðina, sköpunarkraftinn og að kannski séu sumar reglur til að brjóta þær. Í sýningunni er lítið tal svo tungumálakunnátta setur engin mörk. Innblástur er leiksýning fyrir börn á öllum aldri sem vilja leika sér.

Lokasýningar 23. ágúst 2026

Heimsókn í leikhúsið hennar Thalíu

Barnaleikritið Heimsókn í leikhúsið hennar Thalíu er ferðalag inn í ævintýraheim leikhússins þar sem leikhúsið sjálft er í forgrunni. Áhorfendur kynnast leiklistargyðjunni Thalíu, hitta fólkið sem vinnur á bak við tjöldin og verða sjálfir þátttakendur í spennandi atburðarás þar sem drekar, prinsar og prinsessur koma við sögu.

Sýningar hefjast í september 2026

Töfri Töfri

Hinn eini sanni Lalli töframaður er mættur aftur í Tjarnarbíó með glænýja sýningu! ,,Töfri Töfri” er fjölskyldu og barnasýning ætluð leikhúsgestum frá leikskólaaldri og allt upp í langömmur og langafa, enda er sýningin stútfull af töfrum, gríni og gleði fyrir ÖLL!!!

Sýningar hefjast í september 2026

Mikið fyrir börn

Bráðum koma blessuð jólin með kökur og kæti, gjafir og glimmer. Grýla hlakkar mikið til, enda eru jólin hátíð barnanna – og hún er mikið fyrir börn. Stekkjastaur langar mest til þess að hafa það náðugt í hellinum um jólin, en Leppur bróðir hans þráir að fara til byggða og setja í skóinn hjá öllum krökkunum. Grýlu finnst báðar þessar hugmyndir út í hött en kannski tekst sonum hennar að leika á hana. Tóta litla bíður spennt eftir fyrsta jólasveininum. Hún er með langan (eiginlega mjög langan) lista yfir gjafirnar sem hún vill fá. Kannski fær hún bara kartöflu til að narta í. Eða verður nartað í hana?

Sýningar hefjast í desember 2026

Nátttröllið Yrsa: Einmana á jólanótt

Nátttröllið Yrsa sér fram á einmanalega jólahátíð þar sem foreldrar hennar og systkini eru öll orðin að steini. Hjartnæmt leikrit um einmana tröll sem lærir að setja sig í spor annarra og hver veit, kannski eignast hún vin í leiðinni? Einlæg, falleg og sorgleg aðventusaga en húmorinn og sprellið eru aldrei langt undan! 

Sýningar hefjast í desember 2026

UNGI FESTIVAL

Barna sviðslistahátíðin ,,Ungi” verður á sínum stað í Tjarnarbíó í apríl 2027. Þar er á dagskrá aragrúi sýninga fyrir börn á öllum aldri, sýningar bæði frá Íslandi og erlendis frá. Setjið þessa daga í dagbókina!