Ástin ein taugahrúga: Enginn dans við ufsaklett

Ný kammerópera eftir Önnu Halldórsdóttur og Elísabetu Jökuls í uppsetningu leikhópsins Spindrift Theatre. 

„Við förum á ball

og ég er að hugsa um

að bera upp bónorð

þegar ég man eftir

geðhvörfunum mínum

svo það verður ekkert úr því…“

Innri barátta konu speglast í ofbeldisfullu ástarsambandi frá upphafi til enda. Sagan er hádramatísk og hversdagsleg í senn en geðhvörf konunnar lita frásögnina og úr verður rússibanareið á milli alsælu og dýpsta þunglyndis. Draumheimur hennar ræðst ítrekað á raunveruleikann sem fær hana til að velta því fyrir sér hvað það er sem geri hana að „alvöru konu” og hvar lykillinn að hamingjunni leynist.

 En hvort sem konan er stödd á toppnum eða botninum er kímnin aldrei langt undan - á þann hátt sem Elísabetu Jökuls einni er lagið.

„...ég skil ekki af hverju ég gekk ekki út

en kannski vissi ég ekki

hvar dyrnar voru “

Aðstandendur:

Flytjandi: Tinna Þorvalds Önnudóttir

Sellóleikari: Júlía Mogensen

Tónskáld og tónlistarstjóri: Anna Halldórsdóttir

Saga og texti: Elísabet Jökulsdóttir

Leikstjórn og leikgerð: Bergdís Júlía Jóhannsdóttir

Ljósahönnun: Juliette Louste

Sviðs- og búningahönnun: Sara Hjördís Blöndal

Dramatúrgar: Anna Halldórsdóttir og Tinna Þorvalds Önnudóttir

Framkvæmdastjóri: Nanna Gunnars

Ljóðabókin Ástin ein taugahrúga, enginn dans við Ufsaklett, vakti sterk viðbrögð þegar hún kom út árið 2015. Þessi ljóð-saga er byggð á ævi Elísabetar líkt og margar af hennar sögum sem einnig hafa ratað á leiksvið hér á landi. Þetta er fyrsta óperan sem samin er við texta Elísabetar - en örugglega ekki sú síðasta. 

Verkið var flutt í vinnslu sem tónleikauppfærsla í Mengi á Myrkum músíkdögum og í Norðurljósasal Hörpu á Óperudögum í Reykjavík árið 2023, og er nú flutt sem fullunnið óperuverk í Tjarnarbíói.

“Tónlist Önnu Halldórsdóttur gefur textanum nýja vídd, er bæði grípandi og aðgengileg og höfðar bæði til áhugafólks um óperu en líka þeirra sem hafa lítið eða jafnvel aldrei hlustað á óperu fyrr en nú.”