Innblástur

Í blöðruverksmiðjunni Blöðrur ehf. starfar metnaðarfullt og duglegt fólk. Til að tryggja örugg gæði og ánægju viðskiptavina er mikilvægt að allt starfsfólk fari eftir settum reglum og taki vinnunni alvarlega. Það er bannað að mæta seint, bannað að taka of langar pásur og bannað að blaðra. Það er þó ein regla sem er mikilvægust af þeim öllum:

ÞAÐ ER BANNAÐ AÐ LEIKA SÉR MEÐ BLÖÐRURNAR!

(og ekki gleyma að fara eftirlitshringinn)

Innblástur er glæný barnasýning sem fjallar um leikgleðina, sköpunarkraftinn og að kannski séu sumar reglur til að brjóta þær. Í sýningunni er lítið tal svo tungumálakunnátta setur engin mörk. Innblástur er leiksýning fyrir börn á öllum aldri sem vilja leika sér. 

Aðstandendur:

Leikarar og höfundar: Jökull Smári Jakobsson og Nikulás Hansen Daðason

Leikstjóri: Oddur Júlíusson

Leikmynd og búningar: Bryndís Ósk Ingvarsdóttir